Denuncian que a Xunta patrocine rallies en Vigo no canto de concienciar sobre a emerxencia climática

A asociación Verdegaia asegura que a celebración destes espectáculos competitivos reflicte "un problema transversal a toda a sociedade" e apela a partidos políticos e persoas en xeral a tomar conciencia sobre as súas implicacións ambientais.

A asociación ecoloxista Verdegaia vén de emitir un comunicado de denuncia pola promoción dunha competición automobilística por parte da Xunta de Galicia, Deputación de Pontevedra e concellos da comarca de Vigo. Segundo indican, esta actividade é “un claro exemplo da queima innecesaria de combustibles fósiles e de promoción de condutas incívicas nas vías públicas”.

Dende a asociación consideran que nun contexto de emerxencia climática, crecente sinestralidade nas estradas e “milleiros de mortes prematuras en Europa pola contaminación derivada dos vehículos a motor”, esta “festa da queimada de goma e do escape que petardea” celebrada cada 15 días no país e “patrocinada por institucións públicas” non debería ter lugar.

“As administracións, que deberían adicar esforzos para concienciar a poboación sobre a necesidade de minimizar o uso dos vehículos motorizados e promover un modelo de mobilidade máis saudable e beneficioso para o medio social e ambiental, prefiren adicar recursos a patrocinar rallies“, denuncian no comunicado. Verdegaia lembra que só no mes de xuño morreron máis de 20 persoas nas estradas galegas e critica que coches e motos “gozan dunha absoluta impunidade para circular de forma temeraria”.

Concretamente no Concello de Vigo, esta fin de semana celebrarase no Castro unha destas probas urbanas, que a asociación ecoloxista denuncia pola “contaminación atmosférica e acústica” que xera “nun dos poucos espazos verdes da cidade”. Detrás delas atópase a Xunta de Galicia a través de catro institucións diferentes: Deporte Galego, Galicia Saudable, Xacobeo 21-22 e a propia Xunta de Galicia.

“Usar a iniciativa Galicia Saudable para patrocinar unha competición automobilística é unha incoherencia propia dunha Xunta de Galicia que redacta plans contra a mudanza climática ao mesmo tempo que defende a continuidade da Central térmica das Pontes ou de ENCE“, sentenzan dende Verdegaia.

Para a asociación, a celebración destes rallies reflicte “un problema transversal a toda a sociedade”. “Cómpre que partidos políticos, medios de comunicación e as persoas en xeral tomemos conciencia que este tipo de espectáculos competitivos, que pouco ou nada teñen de deporte, promoven un modelo de mobilidade perigoso, contaminante, daniño para a saúde e causante de emerxencia climática”, apelan.

3 COMENTARIOS

  1. Si, estudar sempre é bo. Neste caso, estudar as consecuencias da contaminación sobre o medio e a saúde das persoas.
    O problema non son tanto os rallies en si, senón toda a “cultura do motor” da que os rallies son unha manifestación peculiar. Por suposto que o grave é a mobilidade xeral da poboación, pero o problema con este tipo de eventos é o seu impacto simbólico, educativo, como sucede coas competicións de motos ou formula 1, ademais do impacto concreto da carreira sobre os lugares onde se produce. Esa “cultura do motor” está a frear as posibilidades dun cambio a formas alternativas de desprazarnos, máis colectivas e menos contaminantes. Tamén está detrás das tolerías que fan algúns condutores, moitas veces rapaces moi novos, que poñen en perigo a súa vida e a dos demais.

  2. Se nos preocuparamos doutras cousas que contaminan moito mais… Como os barcos cruceiro e todos os viaxes aéreos ou ir facer o parvo de viaxe oa espacio

DEIXAR UN COMENTARIO

Please enter your comment!
Please enter your name here