O Marisquiño presume de deportistas internacionais a pesar da pandemia

Este ano a actividade repartirase entre o peirao de Trasatlánticos, a Explanada fronte ao hotel Bahía e a Praza da Estrela e son necesarias entradas para ver as diferentes competicións.

Keet Oldenbeuving en OM19 / O Marisquiño

A XX edición do Marisquiño xa conta coa confirmación de destacados deportistas internacionais, que a pesar das dificultades que supón a pandemia do Covid-19 e a coincidencia cos Xogos Olímpicos se animan a vir á cidade olívica para participar no evento.

O skater canadiense Ryan Decenzoserá unha das principais figuras da edición deste ano, que participa por primeira vez neste festival. A el súmanse o arxentino Matias de Ollio e o peruano Angelo Caro, que xa estivo en Vigo no 2019 e que este ano participará no festival despois de representar ao seu país nos Xogos Olímpicos.

A disciplina BMX, unha das preferidas do público do Marisquiño, contará coa participación de riders internacionais como Courage Adams, Daniel Peñafiel “Naran”, Fernando Laczko ou o arxentino José Maligno. En canto ao Descenso Urbano, chegarán a Vigo para participar no festival o portugués José Borges, gañador noutras 3 edicións e o canario Edgar Carballo, vencedor no 2019. En canto á categoría feminina o público poderá gozar da presenza das sete veces gañadora de O Marisquiño Rosi Martínez e de Eva Castro, que triunfou en Vigo dúas veces.

A disciplina de Break Dance tamén conta con representación internacional da man dos portugueses e brasileiros Atlantic Union, os venezolanos Flying Legs que, entre outros, competirán contra a formación española XVII Generation.

Vigo prepárase un ano máis O Marisquiño e a 15 días do festival as obras de infraestrutura xa comezaron para ter todo preparado para o esperado evento. Este ano a actividade repartirase entre o peirao de Trasatlánticos, a Explanada fronte ao hotel Bahía e a Praza da Estrela. A expectación que xera o Marisquiño demóstrase en que en menos dunha semana as entradas para o festival xa case se acabaron, quedando só algunhas para as xornadas matinais de Skate. A reserva púxose en marcha o pasado 15 de xullo, que este ano non terá acceso libre para evitar concentracións do público.

DEIXAR UN COMENTARIO

Please enter your comment!
Please enter your name here