O PP chama aos vigueses a mostrar o seu “rexeitamento” aos indultos a presos do “procés”

O partido inicia unha recollida de firmas e achaca a medida á "debilidade" do Goberno Central.

O deputado do PP, Diego Gago; os senadores Elena Muñoz e Javier Guerra; xunto ao portavoz municipal en Vigo, Alfonso Marnotes, e o edil Jesús Marco, ante a carpa de recollida de firmas contra os indultos a presos do 'procés' na cidade olívica.

O PP de Vigo presentou este luns a campaña de recollida de firmas contra os indultos a presos do “procés”, enmarcada nunha acción do partido a nivel nacional e autonómico, e chamou aos veciños da cidade a participar e mostrar o seu “rexeitamento” a esa medida de graza, que vinculou á “chantaxe” que sofre Pedro Sánchez por parte dos independentistas cataláns e á “debilidade” do presidente do Goberno.

Así, os populares instalaron unha carpa á entrada da rúa Príncipe, que estará ata o día 13 de xuño e, segundo asegurou o deputado no Congreso, Diego Gago, tanto na carpa como na propia sede do partido, o PP recolleu xa “miles de firmas” contra os indultos.

Gago censurou que o Executivo de Sánchez pretenda outorgar beneficios “a quen atacou directamente á Constitución e ao ordenamento xurídico”, e lembrou que os implicados cometeron “delitos graves”, como a sedición e a malversación de fondos públicos.

Pola súa banda, o senador Javier Guerra incidiu en que “non se está falando de indultar a políticos, senón do indulto que se quere dar Sánchez a si mesmo”. “Todo pola chantaxe, e pola súa debilidade”, censurou Guerra, quen criticou que o Goberno central pretenda explicar os indultos “con razóns que son meras falacias” e “cun informe demoledor do Tribunal Supremo en contra”.

Segundo Javier Guerra, o PP “vai pelexar con sentido común” contra esa decisión do Executivo e, tras lembrar que “os involucrados dixeron que o van a repetir”, incidiu en que “isto só se pode parar na rúa”.