A Asociación Veciñal de Teis demanda ao goberno municipal de Vigo que realice unha plantación de arbores autóctonas no monte da Guía. Desde o pasado mes de decembro, o Concello de Vigo encargou a tala de arbores, na súa maioría eucaliptos e acacias, no entorno da baixada ao club de remo, en terreos municipais e privados.
Agora, a Asociación pide a repoboación desas zonas con carballos, castiñeiros, bidueiros ou sobreiras, o que “evitaría que en poucos anos estes tereos estean ocupados novamente por eucaliptos e acacias, árbores invasoras”, indican no comunicado.
Polo momento, a veciñanza de Teis xa se dirixiu á Concellería de Parques e Xardíns para solicitar información ao redor desta tala e para solicitar unha plantación de árbores autóctonas. Dende a asociación tamén reivindican que o Concello de Vigo “merque os terreos privados onde onde se realizou a tala”, posto que están “abandonados”. Facelos públicos implicaría, din, “aumentar os espazos de lecer e esparcemento na praia da Punta e no monte da Guía”.
