Na Sala Apóstrophe de Vigo celebrouse na tarde de hoxe mércores ás 20:00 horas a inauguración dun Cadáver Exquisito de poesía, fotografía e debuxo. De luns a mércores cada tarde foi avanzando a creación ata finalmente acadar o actual resultado.
O cadáver exquisito, subliñan dende a organización, é “un método de creación colectiva que consiste en plasmar algo a continuación doutra cousa, sen preocuparse da coherencia ou sentido que o resultado final puidera ter. É unha técnica utilizada tanto no debuxo coma na literatura dende principios do século XX, especialmente polos surrealistas”.
Apóstrophe Sala de Arte, xunto co Festival Kerouac e o Colectivo Latente, organizaron esta IV edición do Cadáver Exquisito, tendo como novidade este ano as disciplinas de poesía e fotografía, ademáis do debuxo, con participación libre.
Deste xeito, “é un chamamento a tódalas persoas, sen importar a súas aptitudes ou coñecementos técnicos. Queremos fomentar a creación conxunta, o reunirse e colaborar uns cos outros mesturando as distintas disciplinas artísticas. Esta é unha festa da diversidade e do desexo de abrir mentes e derrumbar muros e prexuízos”.
No debuxo, “cada un pode facer o que queira e os demáis poden intervir nos debuxos dos outros”, engaden. Para o poema colectivo, foise despregando un rolo de papel a medida que os participantes escribían os seus versos.
En fotografía estableceuse unha cadea, de tal forma que cada artista recibiu unha imaxe por correo electrónico e debeu atopar unha imaxe no seu arquivo na que se establecera unha relación coa recibida.
O artista a enviaba a súa peza ó seguinte da cadea, tamén por correo electrónico, ata chegar ó último participante. Tras rematar a cadea de imaxes, cada artista imprimiu a súa imaxe nunha impresora instalada ao efecto.