Unha patrulla da Policía Local de Vigo comisionada pola Central de Información e Mando trasladouse a un domicilio da rúa Casal de Arriba onde ao parecer unha persoa de avanzada idade non respondía á chamada dunha cuidadora social.
Unha vez no lugar os actuantes entrevistáronse coa requirente, a cal comunicou que como
todos os días, acode ao domicilio en cuestión para prestar axuda a unha muller anciá que vive soa, pero que esta vez non contestou tras chamar de forma insistente á porta, polo que temeu que lle ocorreu algo.
Os Policías conseguiron acceder ao domicilio a través dunha fiestra, localizando á muller na súa cama, a cal manifestou que non podía moverse, así como que non sabía onde deixara as chaves.
A anciá foi asistida no lugar por facultativos, dado que xa fora requirida unha
ambulancia, sendo trasladada posteriormente ao hospital Álvaro Cunqueiro para unha maior valoración médica. A continuación os axentes puxéronse en contacto cunha familiar, quen se fixo cargo da muller.