As consecuencias da folga convocada polas auxiliares de enfermaría do hospital Álvaro Cunqueiro de Vigo para rexeitar a obriga de trasladar as bolsas da roupa sucia van en aumento, xa que a falta de persoal obrigou hoxe a suspender máis intervencións cirúrxicas e probas non urxentes que na primeira xornada de paro.
Dende a Xerencia da EOXI e a comisión de centro volveron a diferenciarse desta vez nas súas estimacións, posto que os primeiros cifraron no 41% o seguimento da folga, e os segundos no 75%.
Con todo, os efectos do paro deixáronse sentir no centro sanitario, até o punto de que a falta de persoal obrigou a suspender 14 operacións e a pechar as Reas 3 e 4. Ademais, suspendéronse todas as endoscopias de mañá e de tarde que non eran urxentes.
Pola súa banda, a comisión de centro salienta o feito de que a incidencia do paro está a ser máis alta que na xornada anterior e valora moi positivamente o amplo seguimento rexistrado entre as traballadoras “por moito que o xerente queira amedrentalas con ameazas de sancións”.