O Grupo Municipal de EU-SON vén de solicitar ao Concello de O Porriño que “exprese o súa solidariedade ao persoal TCAEs; o apoio ás súas reivindicacións e a defensa da Sanidade Pública; ademais de deixar patente o rexeitamento ás coaccións exercidas pola Dirección do Hospital Álvaro Cunqueiro contra estas traballadoras”.
“O Goberno Autonómico de Feijoo en Galicia, foi o que impulsou a privatización máis profunda e de máis alcance do Estado. A gran posta en escena do modelo de colaboración Público-Privada foi a construción e xestión do hospital de Vigo (Álvaro Cunqueiro) cun sobrecusto do centro, que pasou de 450 a 1750 millóns, asumido polo erario público sen que isto carrease melloras, xa que rebaixaron o número de camas, os quirófanos, ou a superficie de Urxencias e os sevizos de radioloxía”, defenden.
Ademais, consideran “preocupantes” as “derivacións masivas aos hospitais privados, que sempre son xustificadas como alivio ás crecentes listas de espera, unhas listas que non cesan de incrementarse debido á paulatina redución de persoal sanitario na Sanidade Pública”.
“Este binomio público-privado ensaiado polo Partido Popular para o Hospital Álvaro Cunqueiro foi altamente contestado na área sanitaria de Vigo con manifestacións históricas pola alta participación da cidadanía. Para contrarrestar esta alarma social, a administración autonómica utilizou todos os resortes para vender unha imaxe de normalidade para este macro centro hospitalario, desde campañas de prensa ata purgas do persoal médico máis contestatario“, engaden.
Pero este “relato de normalidade”, engaden, “non calou de todo entre unha cidadanía moi sensible a calquera noticia que deixase patente a excepcionalidade deste hospital que foi un fervedoiro de mobilizacións desde o seu recente posta en funcionamento e case todas elas para denunciar como a dirección política privilexia aos xestores privados en detrimento de o público”.
O último conflito están a protagonizalo as TCAEs, auxiliares de enfermaría, “que fartas de ser as mulas de carga viron como a súa demanda de incrementar o persoal, foi respondida pola Dirección do hospital cun non, e a continuación co aumento das tarefas diarias asumindo cargas de traballo que claramente correspondían á empresa privada concesionaria da xerencia do hospital”, subliñan.
O detonante das mobilizacións foi a orde ás TCAEs de asumir a tarefa de trasladar as bolsas de roupa sucia dos pacientes, “cando as auxiliares de enfermería xa están desbordadas ao ser obrigadas a desempeñar labores tamén impropios como a de camareiras”.
“Por suposto, non faltou a aplicación da consabida receita de apertura masiva de expedientes disciplinarios nun van intento de desarticular as mobilizacións e do uso das forzas policiais para invisibilizar as protestas retirando pancartas e carteis da fachada do hospital”, conclúen.
