Os usuarios dos aeroportos galegos aumentaron un 5,81% durante o pasado mes de febreiro, en comparación cun ano antes, ata os 346.458 viaxeiros.
Así o pon de manifesto os datos publicados este venres por Aena, segundo os cales os aeroportos de Santiago e A Coruña experimentaron un crecemento na cifra de viaxeiros no segundo mes do ano, mentres que Vigo sufriu unha diminución. Os aeródromos galegos gañaron, en cifra global, algo máis de 19.000 usuarios.
En concreto, 175.669 persoas pasaron en febreiro polo Aeroporto de Santiago, un 6,3% máis que hai un ano; e 104.964 fixérono polo da Coruña, que experimentou un aumento do 15,4%. No caso de Vigo, a cifra de pasaxeiros diminuíu un 7,6%, ata os 65.825 usuarios.
Do mesmo xeito, o aeroporto da Coruña operou 1.397 voos, un 6,5% máis, e o de Santiago 1.380, un incremento do 1,5%. O aeroporto de Vigo operou 835 voos, un 3,7% menos que hai un ano.