As traballadoras da limpeza do Hotel Bahía de Vigo levan 4 días manifestándose, posto que o día 7 deste mes de maio presentoulles a empresa a carta de despido, “sen ternos dito nada nin a empresa (Aliance) nin o hotel. Entón acudimos á CXT (Conferencia Xeral de Traballadores) para ver como podíamos mobilizarnos, e o sindicato falou con ambas partes pero sen alcanzar un acordo”, declara Maribel Alonso, unha das traballadoras afectadas.
As traballadoras esixen que as readmitan ou que cando menos as coloquen noutro posto de traballo, ata agora a única proposta foi en Oporto, a 140 quilómetros, o cal rexeitan: “Ata o venres manifestarémonos no hotel, o luns en Camelias” (onde está ubicada a sede de Nortempo, a nova empresa concesionaria).
“Non podes mandar 15 persoas á rúa sen antelación ningunha, moitas nais con fillos que queremos sacar adiante, e de súpeto vémonos fóra”, denuncia Maribel. Falaron hoxe co director do Hotel Bahía, César Sánchez Ballesteros, e “díxinos que estaba moi contento co noso traballo, pero se a nova empresa, Nortempo, non nos collía, non era o seu problema, non están poñendo do seu lado”, lamenta Maribel.
“Chega Nortempo e di que non contrata a ningunha. Así que estamos en pé de guerra por un posto de traballo, algunhas traballadoras, xa con 50 anos, non atopan un emprego con facilidade, poden non telo en moito tempo, e levábamos entre un e cinco anos aquí”, denuncia.
Esta traballadora engade tamén que “Aliance, que ao comezo pagábanos moi mal cun convenio desactualizado e acadáramos un convenio dentro da legalidade, pediu unha subida ao hotel, e entón este decidiu cambiar por Nortempo, e todos desentendéronse de nós. Ao día seguinte de amosarnos a carta de despido, xa estaban en activo as novas traballadoras, cun convenio inferior”.
Así que esixen ser restituídas nalgún emprego, xa sexa no mesmo hotel ou na limpeza doutro establecemento, e remarca Maribel que “se, como din dende o hotel, estaban tan a gusto con nós, igual o que deberían de facer é mirar as posibilidades que hai”.