Especialistas de máis dunha ducia de países reuníronse esta semana nun congreso en Vigo co obxectivo de analizar as aplicacións da topoloxía, unha rama das matemáticas que estuda as propiedades inalterables dos corpos xeométricos.

O encontro, denominado 2019 Interdisciplinary Colloquium in Topology and Its Applications, foi inaugurado este xoves na Escola de Enxeñaría Industrial, e prolongarase ata este sábado, segundo detallou a Universidade de Vigo (UVigo) nun comunicado.

En concreto, no evento abordaranse os resultados teóricos e as aplicacións para a vida real da rama matemática que estuda as propiedades dos obxectos xeométricos que permanecen inalteradas aínda que os corpos se preguen, dilaten, contraian ou deformen.

O profesor da UVigo e membro do comité organizador do evento Ricardo Vidal detallou que a topoloxía e a xeometría estudan os mesmos obxectos, aínda que a primeira das disciplinas non se centra “nas distancias ou ángulos”.

Ademais, asegurou que os relatores que participarán no evento, procedentes de Alemaña, Italia, Xapón, Xeorxia, México e España; son profesionais recoñecidos a nivel internacional. Mikhail Tkachenko, da Universidade Autónoma Metropolitana de México, foi o primeiro en intervir.