A aparición dunhas partículas brancas nos colectores metálicos que transportan o material esterilizado obrigou ao Sergas a suspender varias intervencións cirúrxicas en Vigo (que serán reprogramadas) para garantir a seguridade dos pacientes, e manter só as operacións urxentes.
Así o confirmaron este xoves fontes de Sanidade, após a denuncia realizada polo sindicato CC.OO., que criticou a suspensión de “numerosas intervencións cirúrxicas” nos hospitais de Vigo por “problemas co material de esterilización”.
O Sergas admitiu “incidencias” no esterilizado dos colectores do instrumental cirúrxico da Central de Esterilización, e sinalou que a EOXI de Vigo “xa adoptou medidas para minimizar o impacto”.
Segundo sinalaron fontes de Sanidade, detectáronse unhas partículas brancas (que se están analizando) nos colectores de aluminio nos que se transporta o material esterilizado. Por iso, como medida preventiva e “facendo prevalecer o principio de máxima seguridade para os pacientes”, decidiuse “priorizar toda a actividade cirúrxica urxente e aprazar algunhas intervencións programadas, mentres non se liquiden estas incidencias“.
As mesmas fontes informaron do adiamento de 7 intervencións “non urxentes” previstas para este mércores, e outras 25 (das 103 programadas) previstas para este xoves. Todas elas “serán reprogramadas para os próximos días”.
A Federación de Sanidade de CC.OO. denunciou que “non é admisible” unha situación “que se vén repetindo con máis frecuencia da desexada”, e lembrou que este tipo de problemas “non axudan” a diminuír unhas listas de espera que son “as maiores de Galicia”.