InicioSociedade"A pobreza en Galicia ten faciana de muller": contratos temporais, salarios baixos...

“A pobreza en Galicia ten faciana de muller”: contratos temporais, salarios baixos…

Preto da metade das asalariadas galegas non chegan ao salario mínimo.

PUBLICADO O

“Segundo un informe de Oxfam Intermón, no Estado español a pobreza aumentou durante a crise catro veces máis do que se reduciu coa recuperación. Esta crecente fenda entre persoas ricas e pobres castiga sobre todo as mulleres”, subliñan nun recente informe o sindicato CIG. E os datos do Instituto Nacional de Estadística e o Instituto Galego de Estatística corroboran esta hipótese.

Estímase que o 22,2% das mulleres en Galiza viviron por debaixo do limiar da pobreza no ano 2017, practicamente unha de cada catro. A percepción da RISGA (Renda de Integración Social de Galiza) tamén apunta na mesma dirección. Segundo datos do Ministerio de Asuntos Sociais, no ano 2017 o 59% das persoas perceptoras desta en Galiza foron mulleres. Estes datos, para a CIG, constatan “a faciana de muller que ten a pobreza en Galiza”.

E é que no ano 2017, último ano do que dispoñemos datos da Axencia Tributaria, as mulleres en Galiza ingresaron de media 16.123 euros brutos anuais, e os homes 20.554 €, polo que a diferenza a favor dos homes foi de 4.431 € ao ano, o que sitúa a fenda salarial no 21,5%.

“Se comparamos 2017 co ano 2009, os ingresos salariais medios brutos anuais das mulleres medraron un 3,4%; os dos homes, un 1,4%. Neste mesmo período, os prezos -medidos a través do IPC- medraron un 12,7%. Así, a perda da poder adquisitivo da clase traballadora galega é evidente, tanto no caso dos homes como no das mulleres”, conclúen.

Por outra banda, se analizamos os datos do Instituto Nacional de Estadística, podemos comprobar que esta gran fenda salarial é común para todo o Estado. Hai que resaltar que non temos por que estar falando dun salario menor por un mesmo traballo, senón sexa cal sexa o emprego realizado.

Esta fenda é especialmente abultada na terceira idade. Así, entre maiores de 65 anos a diferencia porcentual de salarios entre homes e mulleres estivo entre o 40 e o 50% de 2009 a 2016.

Pero se cadra o máis interesante resulta comprobar como esta fenda non para de aumentar na mocidade. Así, se entre os homes e mulleres menores de 25 anos (liña azul), a diferenza salarial porcentual era dun 6% en 2009, e na actualidade supera o 10%, a pesar do alto nivel de formación da actual xeración de mulleres.

Brecha salarial/ INE

Regresando ao informe do sindicato CIG, resulta claro que “nos tramos de menores ingresos, ata 1,5 veces o SMI (Salario Mínimo Interprofesional), a porcentaxe de mulleres en cada tramo é superior á de homes. A partir deste volume de ingresos, en todos os tramos, a porcentaxe de homes é moi superior, sobre todo a partir de ingresos superiores a 4,5 veces o SMI, onde as diferenzas medran de maneira exponencial, acadándose a distancia maior entre as persoas con ingresos que superan en 10 veces o SMI. Neste caso, e para o ano 2017, en Galiza só eran mulleres o 17% das persoas deste grupo. O tan socorrido teito de cristal”.

E engaden: “O 37% das mulleres que declararon ingresos a Facenda no ano 2017 non chegaron ao SMI. O 20,5% non chega nin á metade deste”.

O aumento das desigualdades chega a niveis “inaceptábeis”, a ollos da Conferencial Internacional Galega: “No ano 2009 unha soa muller das de maiores ingresos cobraría o mesmo que 62 de menores ingresos; en 2017 a relación é de 1 a 85,2. Este forte medre da precarización é consecuencia de que as actividades en que máis medrou a ocupación foron as que teñen os ingresos por salarios máis baixos”.

Durante este período, do mesmo xeito que na economía xeral, no mercado de traballo feminino produciuse unha importante terceirización: “Así, cada vez o peso do sector servizos é maior; concretamente no ano 2017 o 87% das mulleres asalariadas en Galiza traballaban nalgunha actividade relacionada con este sector; no ano 2009 era o 85%. No resto dos sectores destruíuse emprego”.

Por último, no que respecta aos datos aportados polo Instituto Galego de Estatística, resulta revelador comparar o número de homes e mulleres con contratos temporais e indefinidos.

Consultamos os derradeiros datos (último trimestre de 2018) e os de 2005, 2010, e 2015, e sempre o número de homes con contrato indefinido é maior ao das mulleres. Este dato non parece por si só moi destacable, tendo en conta a “recente” incorporación en masa das mulleres ao mercado laboral, pero si á luz doutro dato: desde 2005 sempre hai máis galegas que galegos con contratos temporais, por ende máis precarios.

Ano Galegos con contrato indefinido Galegos con contrato temporal Galegas con contrato indefinido Galegas con contrato temporal
2005 322.500 162.000 226.300 131.100
2010 359.000 102.700 290.400 113.300
2015 308.100 97.900 288.600 105.600
2018 (derradeiro semestre) 331.700 108.300 314.800 118.500

 

ÚLTIMAS

Por que foi anulado o plan de urbanización do Barrio do Cura?

O xulgado do contencioso administrativo 1 de Vigo ditou sentenza pola que declara nulo...

Os 15 pediatras que obtiveron praza por concurso de méritos na área de Vigo teñen ata o 18 de abril para incorporarse

O Diario Oficial de Galicia (DOG) publicou recentemente dúas resolucións que adxudicaron a 70...

Un milleiro de bailaríns, inscritos xa na XII edición de Vigo Porté, que traerá danza e música ás rúas da cidade a finais de...

Un milleiro de bailaríns inscribíronse xa na XII edición de Vigo Portei, desde que...

Constitúese a plataforma “Vigo verde -Salvemos a Barrorca” para rexeitar a talla da Carballeira de Casaliños en Navia

"Este mesmo domingo 17 de marzo, a plataforma "Vigo verde -Salvemos a Barrorca" organiza...