Chus Lago atravesará un lago xeado de Siberia para alertar sobre o cambio climático. A alpinista viguesa, Chus Lago, lidera unha expedición a un lago de Siberia a finais deste mes cun dobre obxectivo: ser a primeira expedición de mulleres en atravesalo e concienciar sobre o desxeo das rexións polares.
Esta aventura enmárcase dentro do proxecto “Compromiso coa Terra”, que aspira a completar 1.500 km de travesía sobre xeo en distintas fases. É a terceira viaxe deste proxecto, despois de Laponia en 2016 (200 km.) e o casquete polar de Barnes, en Canadá, en 2017 (190 km.).
A data de saída está prevista para o día 29 de xaneiro e a expedición terá unha duración de seis semanas. A idea central de “Compromiso pola terra”, proxecto ideado polo propia Lago, é mostrar a fraxilidade das rexións polares, froito do desxeo orixinado polo cambio climático mundial, aproveitando o poder mediático da alpinista e o desafío deportivo para evidenciar ante a sociedade a necesidade de medidas fronte o cambio climático.
Chus Lago, primeira muller española en facer cume en Everest sen osíxeno artificial hai 20 anos, foi tamén a primeira deportista española en alcanzar o Polo sur en solitario nunha travesía que durou 59 días.
Nesta ocasión, irá acompañada de dous alpinistas de recoñecido prestixio: Verónica Romero e Rocío García. Verónica Romero é atleta e montañista, campioa de diversos campionatos, e xa participou xunto a Chus Lago nas expedicións de 2016 e 2017. Pouco despois da súa chegada da illa de Baffin, foi recoñecida cunha homenaxe no seu pobo natal, Mos.
Rocío García é cardióloga e alpinista. Esta gaditana coroou algúns dos cumes máis elevados de Nepal, Perú ou China, e esta será a súa segunda expedición xunto a Chus Lago. Con este equipo, “Compromiso por la tierra” asume o reto de concienciar á sociedade sobre o papel da muller no deporte, mostrando a importancia do liderado feminino e demostrando a súa valía en competencias tan esixentes e duras como unha travesía por terras xeadas.
