No transcurso das sesións celebradas este luns á tarde polos máximos órganos reitores da Zona Franca aprobouse a valoración realizada pola axencia de taxación para a compra do edificio do Reitorado e o anexo que a día de hoxe ocupa a Deputación en 5.615.168 euros.
Esta compra finaliza un proceso de negociacións entre Zona Franca e o Concello de Vigo que se iniciou no ano 2014 para a adquisición do inmoble de titularidade municipal situado na rúa Areal nº 46 e que se pechou este luns coa inclusión do edificio anexo para o que xa se tomou acordo no Comité Executivo do Consorcio do día 26 de setembro, cando se procedeu ao comezo do correspondente expediente administrativo co fin de adquirir a propiedade dos inmobles da rúa Areal nº 46 e O Porto nº 3, cuxa titularidade corresponde ao Concello de Vigo, cunha superficie catastral de 2.782 m2 un deles e 991 m2 o outro.
Concluída a tramitación do expediente para a adquisición dos mencionados inmobles e á vista do resultado da taxación que establece un importe total de 5.615.168 euros, pola suma de 3.487.801 euros nos que se valora a superficie catastral de 2.782 m2 correspondente ao edificio da rúa Areal, e en 2.127.367 euros dos 991 m2 do outro do edificio da rúa O Porto, ambos os organismos acordaron a adquisición dos dous inmobles propiedade do Concello e a autorización ao Delegado do Estado para que formalice o correspondente precontrato así como os documentos necesarios ata a efectiva adquisición das propiedades.
Desde o punto de vista do Consorcio, o fin das devanditas adquisicións é, principalmente, destinalas ao desenvolvemento e dinamización económica da área de influencia de Vigo, en concreto destinar o edifico do reitorado a sede da Zona Franca e o anexo, para adecualo como centro de negocios no que sexa posible o encontro entre os diferentes actores sociais e económicos da cidade.
Por outra banda, no razoamento exposto no Comité Executivo para a toma deste acordo explícase que o edificio que alberga a sede do CZFV en Bouzas en réxime de concesión administrativa outorgada pola Autoridade Portuaria, no que prestan os seus servizos un total de 55 persoas nunha superficie duns 2.365 m2, apenas se usa dúas veces ao ano, e pode destinarse a cubrir a importante demanda de empresas, e autónomos, nun recinto como o de Bouzas, vixiado, pechado, con bos accesos para o tráfico rodado e que se atopa a dez minutos do centro de Vigo.
Por outra banda, o Comité Executivo, en virtude da delegación do Pleno, tamén aprobou a compra dunha vivenda situada nos terreos da futura ampliación do Parque Tecnolóxico e Loxístico. Esta ampliación está pendente da aprobación por parte da Xunta de Galicia do seu Proxecto Sectorial.
