InicioPolíticaCaballero responde a Feijóo: "Está resentido polo noso éxito, do que fala...

Caballero responde a Feijóo: “Está resentido polo noso éxito, do que fala toda España”

Ademais de respostar ás críticas do presidente da Xunta, que comparou Vigo con Venezuela, o alcalde de Vigo asegurou que na primeira fin de semana xa se recuperou o investimento das festas.

PUBLICADO O

Cando o señor Feijóo compara a Vigo con Venezuela mostra o enorme resentimento que ten con esta cidade”, vén de subliñar o alcalde da cidade olívica, Abel Caballero.

“Non lle gusta que a Vigo vaian as cousas ben, porque o Nadal de Vigo e as luces de Vigo están a traer á cidade a miles, ducias de miles de persoas de toda Galicia e toda España, e por tanto traen negocio, traen economía, traen emprego”, celebrou.

Así, o rexedor destaca que “o sector da economía vai ben, o comercio ten máis clientes que nunca porque fixemos unha festa de Nadal que con pouquiño diñeiro está a xerar unha enorme cantidade de recursos”.

“Soamente na primeira fin de semana xa se multiplicou por tres o gasto que fixeramos na contratación das luces”, asegura: “O señor Feijóo, cando critica que se colleu unha empresa de fóra de Vigo, ignora que parece insinuar que hai que cometer un delito, porque esa empresa gañou un concurso público”.

Caballero durante a inauguración das luces/ Miguel Núñez

“E cando di que hai que comprar lámpadas en Galicia, primeiro non se compra ningunha, é unha compañía que as pon, as aluga e máis tarde se devolven”, engade.

“Está resentido, porque o que el anticipaba e quería que fose un fracaso está a ser un éxito do que fala toda España. E isto Feijóo non o soporta, que nos vaia ben á cidade, que os hoteis teñan niveis de ocupación moi altos, que os restaurantes teñan xente, que os comercios vendan”, enumerou.

“Esta ponte da Constitución imos volver a encher a cidade con visitantes. A el encantaríalle que as luces non funcionasen, porque o señor Feijóo vive no resentimento”, lamenta: “A cidade de Vigo non lle quere porque non atende a Vigo, porque non inviste en Vigo, porque non gasta en Vigo. Este é o drama de Feijóo. É o único presidente autonómico que coñezo en toda España que non se alegra de que á cidade máis importante do seu territorio as cousas lle vaian ben, e que ademais a critique e busque por todos os medios que lle vaia mal”.

Por último, recomendoulle que cando compare Vigo con Venezuela “diga que temos débeda cero, que temos superávit, cumprimos co teito de pago, somos os mellores pagadores aos provedores do Concello e somos un modelo en finanzas e en investimento en toda España”.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...