A UVigo inaugura unha exposición permanente de minerais doada polos herdeiros de Manuel de Sas

Esta mostra foi reunida durante anos por este doutor e socio fundador de Povisa, e seguirá medrando grazas ás achegas da comunidade universitaria.

Exposición na EE de Minas e Enerxía/ Duvi

Coincidindo co día de celebración da súa patroa, Santa Bárbara, a Escola de Enxeñaría de Minas e Enerxía, inaugurou este martes a exposición permanente de minerais cedida polo doutor Manuel de Sas de la Encina.

O acto estivo presidido polo reitor da Universidade de Vigo, Manuel Reigosa, e polo concelleiro Jaime Aneiros, xunto coa directora do centro, Elena Alonso e unha boa parte da familia de Manuel de Sas, incluíndo fillos e fillas, netos e netas e mesmo bisnetos e bisnetas, ata un total de 19 persoas.

A mostra xorde da doazón á EE de Minas e Enerxía da colección de minerais e pedras preciosas por parte dos herdeiros do doutor Manuel de Sas de la Encina, socio fundador do hospital Povisa.

Exposición na EE de Minas e Enerxía/ Duvi

Esta colección estivo exposta nas instalacións do centro médico durante 22 anos ata que a familia a doou á Universidade de Vigo. Consta de arredor de 200 exemplares, algúns deles “únicos e de gran beleza natural, incribles cores, asombrosas texturas e formas sorprendentes”, como explican dende o centro académico.

O seu fillo Antón deu as grazas en nome da familia e explicou que a inauguración desta mostra sería o “soño cumprido” dun home “singular e polifacético”. Como afeccionado á mineraloxía, lembraba, formou esta colección grazas a numerosas viaxes ao longo do mundo durante toda a súa vida e, tras elas, foina completando “con ilusión e esforzo ata o seu falecemento”.

Segundo o seu fillo, “cada peza ten a súa historia e el encantáballe contalas, relatar onde conseguira cada unha” e, por este motivo, o seu pai quixo dar un paso máis para que colección estivese a disposición de toda a sociedade, como sucederá a partir de hoxe.

Exposición na EE de Minas e Enerxía/ Duvi

O reitor da Universidade, Manuel Reigosa, expresou o agradecemento da institución académica tanto á familia como a Povisa pola cesión e remarcou que esta colección é resultado do “esforzo e a curiosidade intelectual de Manuel de Sas”, valores que son os que a propia Universidade “quere espertar na nosa xuventude, esa curiosidade científica, esa necesidade de saber e de espallar o coñecemento”.

Coincidía na reflexión a directora da escola, Elena Alonso, que remarcaba que “o que comezou como unha afección acabou sendo paixón polo coleccionismo de minerais e pedras preciosas” e esta faceta de Manuel de Sas “representa un dos valores esenciais para unha comunidade universitaria, o afán por coñecer e por descubrir, o valor do esforzo constante, continuado, paciente e sistemático, común ao investigador e ao coleccionista”.

Ademais das pezas doadas polo doutor De Sas, a esta mostra súmanse exemplares cos que conta a escola, rochas e minerais procedentes de fondos propios, doazóns de particulares e exemplares recollidos por estudantes do centro e pezas da Sociedade Mineralóxica Galega, “para conformar unha exposición permanente que está accesible a toda a sociedade no campus vigués, como era o desexo do doutor De Sas”.

Esta exposición nace ademais cunha clara vontade de crecer e concíbese como unha mostra dinámica, que se irá enriquecendo con novas achegas de materiais e se completará coa organización de actividades paralelas.

DEIXAR UN COMENTARIO

Please enter your comment!
Please enter your name here