O Gamboa, buque punteiro para a navegación en augas polares, sae do porto de Vigo rumbo á Antártida

O 'Sarmiento de Gamboa' foi construído nos Estaleiros Freire en Vigo, cun investimento de 22 millóns de euros.

O Sarmento de Gamboa abandona o Porto de Vigo/ Miguel Núñez

O buque oceanográfico Sarmiento de Gamboa, operado polo Consello Superior de Investigacións Científicas (CSIC), partiu este venres pola mañá do Porto de Vigo, onde ten a súa base de operacións, para participar na XXXII Campaña Antártica Española.

O seu obxectivo, unha vez na Antártida, será dar apoio loxístico ás bases antárticas Juan Carlos I e Gabriel de Castela, ademais do desenvolvemento de dous proxectos científicos.

O buque foi despedido polo secretario de Coordinación de Política Científica e presidente do Comité Polar, Rafael Rodrigo; o delegado do CSIC en Galicia, Eduardo Pardo de Guevara; o director da Unidade de Tecnoloxía Mariña do CSIC, Jordi Sorribas; a representante da Axencia Estatal de Investigación Lourdes Armesto, e o xeneral de Brigada do Exército de Terra, Alfredo Pérez Augado, entre outras autoridades e representantes das entidades participantes na campaña.

O Sarmento de Gamboa abandona o Porto de Vigo/ Miguel Núñez

As bases antárticas españolas Juan Carlos I e Gabriel de Castela estarán abertas ao redor de 100 días e acollerán a 130 persoas, entre persoal científico e técnico. Será unha das campañas máis internacionais, xa que contará co apoio e a participación de científicos de 15 nacionalidades distintas (Alemaña, Austria, Brasil, Bulgaria, Colombia, Eslovenia, Estados Unidos, Indonesia, Italia, Perú, Portugal, Chile, Noruega, Reino Unido, Rusia e Uruguai), tanto nas bases como nos buques.

Para a campaña que se inicia agora, o CSIC, co apoio do Ministerio de Ciencia, Innovación e Universidades, actualizou o equipamento do buque. “Puxemos o foco na seguridade do persoal embarcado para cumprir coa certificación de categoría C dentro do novo Código Polar da Organización Marítima Internacional. Isto supón que o Sarmiento de Gamboa é o primeiro barco español en ser certificado baixo este código, que obriga aos buques que teñan intención de navegar en augas polares a que cumpran certos requirimentos”, indicou Jordi Sorribas, director da Unidade de Tecnoloxía Mariña do CSIC.

O Sarmento de Gamboa abandona o Porto de Vigo/ Miguel Núñez

O CSIC participa na campaña antártica con cinco proxectos de investigación, que mobilizarán a unha quincena de investigadores procedentes de varios centros. O Museo Nacional de Ciencias Naturais participa con dous proxectos, un sobre o estudo dos tapetes criptogámicos nas zonas polares, e outro proxecto sobre a ecoloxía dos pingüíns e as súas capacidades para a procura de alimento no ámbito do cambio climático.

Tamén forman parte do proxecto científicos do Instituto de Ciencias do Mar, cunha investigación sobre o estudo e influencia dos aerosois mariños nas zonas polares e as súas interaccións coa atmosfera.

Doutra banda, o Instituto de Ciencias da Terra Jaume Almera realizará estudos sobre o efecto das grandes erupcións volcánicas sobre o clima global. Por último, o Observatorio do Ebro (centro mixto entre a Universitat Ramón Llull e o CSIC) continuará coa xestión do observatorio geofísico da Illa Livingston, dependente da BAE Juan Carlos I.

O Sarmento de Gamboa abandona o Porto de Vigo/ Miguel Núñez

O Sarmiento de Gamboa ten xa unha década de traxectoria, na que completou máis de 70 misións en campañas e proxectos sobre diversas áreas da investigación mariña; e percorreu máis de 250.000 millas náuticas, o que sería equivalente a dar a volta ao mundo polo ecuador dez veces.

Foi construído nos Estaleiros Freire de Vigo en virtude do convenio subscrito en decembro de 2003 polo entón Ministerio de Ciencia e Tecnoloxía, o CSIC e a Xunta de Galicia, cun investimento de 22 millóns de euros. Conta coas tecnoloxías máis avanzadas.

Desde a súa primeira campaña (2007), o buque completou con éxito máis de 75 proxectos, alcanzando en moitas ocasións fitos destacables, entre os que figuran o despregamento do primeiro laboratorio submarino, (GEOSTAR), para alertas de tsunamis no Golfo de Cádiz; o despregamento e instalación do primeiro laboratorio submarino cableado de España, ( OBSEA), na costa catalá; a participación no estudo do impacto do cambio global e a biodiversidade do océano no marco da expedición de circunnavegación Malaspina 2010, ou a obtención por primeira vez de imaxes corticais da zona de colisión entre Eurasia e África.

DEIXAR UN COMENTARIO

Please enter your comment!
Please enter your name here