Axentes da Policía Local de Vigo que circulaban en funcións de prevención pola rúa Urzaiz na madrugada deste xoves observaron como un vehículo da marca Volkswagen Golf se introducía na Gran Vía sentido Praza de España en dirección contraria, motivo polo que accionaron os dispositivos luminosos do vehículo, logrando a súa detención á altura da rúa Brasil.
No momento da identificación, os actuantes comprobaron que presentaba claros síntomas de atoparse baixo os efectos do consumo de bebidas alcohólicas, sendo convidado a realizar a proba preceptiva de determinación do grao de impregnación alcohólica.
Tanto a primeira como a segunda proba deron un resultado positivo de 0,90 miligramos de alcol por litro de aire expirado, sendo esta taxa moi superior á máxima permitida.
O home, de 52 anos de idade, nado e domiciliado en Portugal, foi encartado en dilixencias xudiciais en calidade de investigado por un presunto delito contra a Seguridade Viaria.