Air Nostrum busca tripulantes de cabina en Vigo

Aeroporto de Peinador
Espera na terminal diante dun avion de Iberia/ Miguel Nuñez

Air Nostrum, a aeroliña de Iberia para voos rexionais, vén de iniciar un novo proceso de selección de tripulantes de cabina de pasaxeiros ( TCP) para incorporar ao seu persoal. Responsables da compañía realizan unha xira por diversas provincias para avaliar aos posibles candidatos.

Neste novo proceso realizaranse avaliacións en cinco cidades. En novembro a xira iníciase o martes 20 en Valencia, seguiranlle o xoves 22 Santander, o martes 27 Vigo e o xoves 29 Zaragoza.

En decembro pecharase este período de selección cunha nova xornada o xoves 13 en Madrid. Os interesados en asistir aos procesos de selección poden consultar os requisitos na web da compañía, onde poderán inscribirse para a xornada introducindo o seu currículo.

Os preseleccionados serán citados pola empresa para a entrevista persoal, á que deberán acudir con dúas fotos de tamaño carné e unha de corpo enteiro, unha fotocopia do Documento Nacional de Identidade (DNI) ou, se fose preciso, o permiso de residencia e traballo, tres copias do CV e unha certificación dos estudos cursados.

Aqueles que superen a entrevista e as probas psicotécnicas terán a posibilidade de realizar un curso específico de mes e medio no que recibirán a formación coa que conseguirán o certificado de voo xunto coas habilitacións que lles permitirán realizar o seu labor nas diferentes aeronaves da compañía.

Air Nostrum é a compañía líder da aviación rexional en España e unha das maiores aeroliñas europeas da súa clase. Opera para o Grupo Iberia baixo a marca Iberia Rexional Air Nostrum, factura 458 millóns de euros e conta con máis de 1.400 empregados.

DEIXAR UN COMENTARIO

Please enter your comment!
Please enter your name here