O grupo municipal Marea de Vigo vén de chamar ao diálogo entre institucións, despois de ter recibido a información de que o Real Club Celta segue coa intención de crear un novo estadio en Vigo cando están no seu ecuador as reformas de Balaidos.
“Para nós é unha novidade que o que se está plantexando sexa a construción dun novo estadio en Vigo cando os comuneiros de Mos rexeitaron o proxecto”, subliña Rubén Pérez, portavoz de Marea de Vigo.
Chega por sorpresa a pretensión do Celta de realizar o novo estadio, “pero tamén entendemos que o club foi excluído do proceso de reforma de Balaídos, un proxecto ademais feito por partes e coa financiación de dúas administracións, e unha delas que non entendemos por que puxo recursos públicos alí, como é a Deputación de Pontevedra”, denuncia Pérez.
Para o grupo municipal está claro que “hai que recuperar a senda do diálogo para rematar as obras de Balaídos e darlle a concesión do estadio ao club por 25 anos, tendo en conta que esta non debería estar por debaixo dos 800.000 euros anuais para garantir o retorno dos recursos públicos”.
“Pero agora estamos nunha situación de empantanamento, e a actitude de pouco diálogo do Concello co Celta e o club sen ser tampouco claro, non vai axudar a resolvelo”, lamentan.
En canto á cidade deportiva, para este grupo o máis adecuado sería o regreso do proxecto a Vigo, “que para nós tería que ir ligado á desaparición da superficie comercial, que ía ligada tamén ao proxecto da cidade deportiva en Mos, pola cuestión de poder financiar os accesos que requería o plan xeral”.