As perdas de 2017, inasumibles para os montes veciñais, aumentan aínda máis o risco de incendio

Árbol talado/ Miguel Núñez

A Asociación Forestal de Galicia aínda agarda por un plan público de restauración dos montes afectados pola vaga de lumes, en risco de abandono. O colectivo lembra a necesidade de apoios que permitan a recuperación dos bosques afectados, que corren un serio risco de ‘selvatización’.

Parte dos traballos de corta e saca da madeira queimada están aínda sen acometer no primeiro aniversario da vaga de lumes do outono do 2017, que arrasou arredor de 50.000 hectáreas en Galicia.

Desde a Asociación Forestal agárdase un plan público de restauración que permita afrontar a recuperación dos bosques calcinados. A vaga de lumes levou por diante boa parte do patrimonio forestal de comunidades de montes do sur de Pontevedra que estaban a distinguirse pola súa boa xestión.

Só en comunidades socias da Asociación Forestal de Galicia, as perdas na provincia de Pontevedra pola vaga de lumes foron de 18,9 millóns de euros, cuns custos de restauración estimados en arredor de 10 millóns de euros.

Os montes veciñais, que quedaron descapitalizados a raíz dos lumes, vense agora sen posibilidades de afrontar as necesarias tarefas de restauración dos montes afectados, nos que haberá que acometer plantacións e tarefas que faciliten a rexeneración do bosque.

O eucalipto medra/ Miguel Núñez

Cómpre lembrar que a propia Consellería do Medio Rural, en visita cursada en decembro do 2017 a montes afectados do Condado-Paradanta, se comprometera coa Asociación Forestal de Galicia na busca de financiación para impulsar un plan de tales características.

“De non acometerse un plan de restauración, boa parte dos montes corren un serio risco de abandono e selvatización, pois ante os escasos recursos económicos propios cos que contan os propietarios, reduciranse os traballos de xestión, o que aumentará os riscos futuros de posibles incendios forestais”, advirten.

Para esta asociación, “resulta significativo que un ano despois dos lumes, parte da madeira afectada estea aínda sen retirar do monte por diversas circunstancias”.

1 COMENTARIO

  1. A xestión non sería tan boa, xa que arderon hasta as trancas e ahora están mendigando subvencións para quitar a madeira.
    O monte galego non necesita subvencións, necesita liberalización, e ser donos dos nosos terreos, que o monte comunal esté ben xestionado é un mito, confundese boa xestión con deixarlle facer ós políticos o que queren.
    En Valdoviño apearonse os montes comunais, plantaronse eucaliptos e a xente está sacando a vida adiante sin subvencións nin choros.

DEIXAR UN COMENTARIO

Please enter your comment!
Please enter your name here