O Coordinador de Cidadáns en Vigo, Gregorio García, denunciou estes días o “elevadísimo” Imposto sobre os Bens Inmobles (IBI) que soportan os vigueses xa que, segundo explicou, a cota deste imposto “é a máis elevada das cidades cun nivel similar de poboación e un 50% superior ao da Coruña”.
Para García, a conxelación prevista polo Concello “non é suficiente, porque nos últimos anos, a presión fiscal, incrementouse de xeito considerable”, e por iso reclama unha redución neste imposto. “En Ciudadanos apostamos por aliviar a presión fiscal sobre os cidadáns e por devolver á clase media traballadora os esforzos que fixeron durante a crise”, sinalou.
O Coordinador da formación liberal en Vigo considera “prioritario” axustar a recadación municipal cunha política fiscal de “impostos os mínimos e necesarios para cubrir as necesidades da cidade”, e afirmou que “o diñeiro debe estar en mans dos cidadáns para que isto redunde en maior prosperidade, investimento e crecemento económico”.
Por todo iso, desde Cidadáns propuxeron a baixada destes impostos, así como “aumentar a transparencia na política fiscal do Concello para coñecer en que se gasta o diñeiro que consegue cos impostos de todos os vigueses”, concretou García.