A presidenta da Deputación de Pontevedra, Carmela Silva, xunto ás deputadas e deputados do goberno provincial, inaugurou esta tarde no transcurso dunha espectacular gala chea de sorpresas, música, teatro e audiovisuais, o esperado proxecto de musealización do Castelo de Soutomaior.
A través desta iniciativa, posta en marcha pola institución provincial, tal e como asegurou a súa presidenta, “queremos que Soutomaior sexa o corazón de todas as historias que temos que contar porque na provincia de Pontevedra “Somos historias” e practicamente todas elas cobran vida propia no Castelo”.
O proxecto de musealización, “á altura dos mellores castelos do mundo”, é unha aposta por recuperar este recinto histórico para a cidadanía da provincia.
“Queremos abrir á xente, ás familias, un espazo que é de todas e de todos e queremos facelo cun Castelo renovado, cheo de contidos que poñen de manifesto a importancia deste enclave tanto para a provincia como para o resto de Galicia e do Estado”, asegurou a presidenta provincial.
Centos de persoas do mundo público, social, económico, cultural, turístico, deportivo e veciñal da provincia se deron cita no evento, no que a través de María Vinyals e o Doutor Lluria, púxose en valor a historia do Castelo xunto ao o variado e singular patrimonio da provincia de Pontevedra.
O acto comezou cunha representación simbólica da sinatura da acta de entrega do Castelo por parte da presidenta provincial, Carmela Silva, da man de Vinyals e Lluria. Trala sinatura, na porta de acceso ao Castelo, as autoridades e convidados entraron no patio de Armas mentres o dúo musical Cómplices interpretaba pezas musicais en directo.
No patio de Armas proxectouse un vídeo de dous minutos no que se presentaron as actuacións acometidas pola Deputación no recinto, convidando á cidadanía a que o visite e coñeza o proxecto de musealización no que se pon en valor “o legado das Rías Baixas como nunca antes foi contado”.
Amais, Vinyals e Lluria repasaron a historia do Castelo, dende o medievo, pasando polo século XIX, ata o actual proxecto de musealización. Neste eido, a propia Vinyals destacou que o Ben de Interese Cultural conta desde agora con “dez salas, con vídeomapping, proxeccións en 3D, audiovisuais interactivos, reproducións de documentos históricos, xogos e maquetas que recollen a historia do castelo desde o século XII ata a actualidade”.
Finalmente proxectouse un vídeo de catro minutos que leva como banda sonora “Un lugar en el mundo”, a peza composta por Teo Cardalda que foi tamén o tema central da campaña turística da Deputación de Pontevedra.
Este novo audiovisual, que formará parte das accións promocionais da Deputación a partir de hoxe mesmo, ten como nexo común a melodía de “Cómplices” a través dun piano branco –o mesmo que estivo presente tamén durante a gala en Soutomaior- situado nos diferentes elementos do patrimonio fortificado da provincia de Pontevedra.
A través das imaxes e da música o vídeo recolle desde castelos como os de Soutomaior e Sobroso (Mondariz), a fortalezas como as de Baiona e Goián (Tomiño), torres como as da Lanzada (Sanxenxo) e Tebra (Tomiño), a capela da Peneda de Soutomaior, vistas da Guarda e de praias como as de Nigrán con Cíes ao fondo.
Ao remate da gala serviuse un aperitivo no que o espumoso de Albariño foi protagonista e entregáronse ás persoas convidadas cadernos e postais coa imaxe do Castelo de Soutomaior. Tamén se dispuxo un libro de visitas, que vai quedar no Castelo desde hoxe, para que as persoas que acudan ata o recinto histórico deixen as súas impresións sobre a visita.
Esgotadas as prazas para as visitas guiadas das xornadas de portas abertas
A primeira xornada de portas abertas resultou “un éxito absoluto, rexistrándose preto dun millar de persoas, con ata grupos de homes, mulleres e moitos nenos e nenas procedentes de Portugal e Alemaña”, indicou a presidenta provincial.
Para as vindeiras xornadas de portas abertas, os días 20, 21, 22, 24 e 25 de maio, a Deputación de Pontevedra mantén a visita libre aberta a toda a cidadanía, xa que as prazas para as visitas guiadas están completamente esgotadas.