InicioMedio Ambiente e PatrimonioA presentación do novo bosque autóctono con máis de 12.000 metros cadrados...

A presentación do novo bosque autóctono con máis de 12.000 metros cadrados ilusiona Soutomaior

Está prevista tamén a creación de diferentes áreas de descanso que servirán de miradoiros.

PUBLICADO O

O Concello de Soutomaior presentou esta semana o proxecto “ Arboretum”. Unha iniciativa coa que se recuperará a contorna do novo instituto público mediante a creación dun bosque de especies autóctonas, e máis de 12.000 metros cadrados, con fins educativos.

A plantación dos primeiros exemplares está prevista antes da chegada da primavera. A iniciativa ten como principal obxectivo difundir a riqueza forestal dos bosques autóctonos e conseguir unha colección de especies arbóreas o máis representativa posible que permita a creación de varios percorridos didácticos.

A intención, indicou Reguera durante a presentación, é que o novo bosque se integre dentro dos espazos educativos do instituto. “O novo bosque será a aula de natureza do instituto e servirá para mellorar a educación ambiental dos alumnos”, destacou o edil.

O bosque contará con máis de 30 especies autóctonas e representativas do bosque atlántico tradicional. Para iso, seleccionáronse exemplares de variedades de “carballeiras, bidueiros ou acivros”, ademais de dez especies diferentes de arbustos.

Para fomentar a difusión deste bosque educativo, crearanse percorridos didácticos nos que se terá en conta o acceso de persoas con mobilidade reducida ou problemas de visión, de maneira que se poidan realizar traxectos alternativos adaptados a diversos colectivos.

A instalación do novo bosque ten unha dobre vantaxe, xa que ademais de supoñer unha ferramenta práctica ao servizo da comunidade educativa, servirá para recuperar os terreos anexos ao instituto tras os movementos de terras necesarios para a construción do centro.

“Xa encargamos todas as árbores e, se a meteoroloxía o permite, nun par de semanas comezaremos coa plantación e a creación das sendas”, indicou Reguera, que explicou que “a plantación das primeiras árbores está prevista para finais deste mes para que a chegada da primavera favoreza o arraigamento”.

Por último, aproveitando a altitude do terreo, está prevista a creación de diferentes áreas de descanso que servirán de miradoiros desde os que se poderá contemplar a paisaxe e gozar das excelentes vistas panorámicas que ofrece a desembocadura do río Verdugo.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...