A Agrupación de Electores/as de Redondela (AER) presentou este martes a renuncia dos seus concelleiros ás competencias que tiñan no goberno municipal desta localidade, executando así o anuncio realizado hai semanas de que abandonarían este goberno en canto chegase o mes de setembro.
AER conta na Corporación redondelana con tres concelleiros, Roberto Villar, Manuel Vila e Daniel Boullosa que, ata agora, desempeñaban tarefas no goberno local, nas áreas de Medio Ambiente; Transparencia, Novas Tecnoloxías e Participación Cidadá; e Cultura e Turismo, respectivamente.
Esta marcha do goberno municipal ten a súa orixe na crise aberta tras a decisión da alcaldesa socialista, Digna Rivas, de retirar a Villar as súas competencias na limpeza de praias. O conflito suscitouse pola discrepancia entre ambas as formacións acerca da forma en que debía acometerse esa limpeza (AER pedía que se fixese de forma manual e a alcaldesa decidiu que dita actuación non podía atrasarse ante as queixas dos veciños pola existencia de gran cantidade de algas nos areais).
Así, tras rexeitar o PSdeG a petición de AER de que Digna Rivas dimitise, a agrupación de electores anunciou a súa saída do goberno local. Ademais, poucos días despois dese anuncio, AER presentou unha solicitude ante a Xunta, para que se investigue a actuación da rexedora no areal de Cesantes, que foi limpiado con medios mecánicos “agresivos”, e sen ter en conta os condicionantes propios dun espazo que forma parte da Rede Natura 2000.
AER informou de que, nas últimas semanas, estivo a disposición do grupo socialista “para o traspaso de información, documentación e contactos necesarios” para que a xestión das súas áreas “non se vexa afectada”.
A partir de agora, AER pasará á oposición no Concello de Redondela, deixando ao grupo do PSdeG, encabezado por Rivas, nunha notable minoría, ao cargo dun goberno de 7 edís nunha corporación de 21 concelleiros.