Redondela urxe ao Goberno central a eliminar a peaxe de Rande

Rande Domaio
Ponte de Rande dende Domaio/ Miguel Nuñez

O Goberno de Redondela, canda a Xunta de Galicia, volve esixir ao Ministerio de Fomento que suprima a peaxe de Rande e a que cumpra cos investimentos comprometidos coa parroquia de Chapela tras a ampliación da AP-9.

O alcalde Javier Bas, xunto co vicepresidente galego, Alfonso Rueda, visitou este martes as obras que se están realizando neste municipio, con apoio económico da Xunta. Durante a visita, Rueda criticou que “seguen pasando os días” sen que Fomento “dea sinais” dos compromisos adquiridos con este municipio.

A Xunta recorda que tramitou o traslado do CEIP Igrexa, e as obras do novo colexio “xa empezaron” e “agora tócalle a Fomento facer o investimento comprometido”, incluída a supresión da peaxe en Rande-Redondela.

Ante esta situación, o Executivo galego e o Concello de Redondela instan ao Goberno central a convocar o máis axiña posible a comisión de seguimento da AP-9.

Respecto a Chapela, Bas lamentou que a parroquia segue sufrindo as consecuencias das obras da autoestrada e recordou que “había un compromiso firme” para investir uns 11 millóns de euros en reposición de servizos, mellora de viarias, pantallas acústicas, etc. Aínda que recoñeceu que isto ten que pasar polo Consello de Ministros, entende que hai unha “falta de sensibilidade de Fomento, porque os principais prexudicados son os veciños”, sentenciou.

DEIXAR UN COMENTARIO

Please enter your comment!
Please enter your name here