O Porto de Vigo continúa colaborando na procura de solucións ao problema de conxestión que existe na actualidade en importantes terminais de coches europeas e que, por extensión, tamén está a afectar á de Bouzas, onde permanecen aparcados miles de coches producidos na factoría viguesa do grupo automobilísticos Stellantis.
Tal como indicaron desde a Autoridade Portuaria olívica nun comunicado, as causas desta situación son múltiples, como as derivadas do desequilibrio da economía mundial tras a pandemia ou a invasión de Ucraína por parte de Rusia.
Isto provocou a falta de aprovisionamentos de determinadas pezas, a alza do prezo da enerxía, unha produción irregular ou folgas que afectan os transportes por estrada en diferentes zonas de Europa.
“Esta situación global está, por unha banda, dificultando a evacuación de automóbiles desde o Porto de Vigo e, por outra, obrigando a buscar novos destinos nos que desembarcar as unidades exportadas desde Vigo, dado o colapso que existe noutras terminais a nivel europeo”, subliñou o Porto de Vigo.
Por iso, a institución que preside Jesús Vázquez Almuiña mantén reunións con representantes de Stellantis e dos operadores loxísticos da terminal co obxectivo de buscar posibles alternativas ao stock dos vehículos fabricados na cidade.
Entre estas solucións, e ante a necesidade de que se incrementen tanto o número de barcos como a súa frecuencia para desconxestionar a terminal, o Porto de Vigo, a Xunta e a Zona Franca acordaron ofrecer espazo na Plataforma Loxística e Industrial de Salvaterra-As Neves (Plisan) para o almacenamento temporal destes vehículos, onde hai capacidade para acoller unhas 7.000 unidades. Ademais, entre este mércores e xoves uns 6.000 modelos abandonarán Vigo en varios buques.