InicioCulturaA UVigo lidera unha das principais tecnoloxías que definirán as comunicacións seguras...

A UVigo lidera unha das principais tecnoloxías que definirán as comunicacións seguras do futuro

A intención é lanzar un satélite comercial geoestacionario para comunicacións cuánticas, algo que, se todo sae ben, podería producirse en 2025.

PUBLICADO O

A Universidade de Vigo (UVigo) está a liderar un dos paquetes de traballo de Caramuel, a primeira misión satelital en órbita geoestacionaria para comunicacións cuánticas, unha das principais tecnoloxías que definirá as comunicacións seguras do futuro.

Financiado pola Axencia Espacial Europea e liderado pola empresa Hispasat, este estudo reúne a múltiples compañías e organismos de relevancia internacional co obxectivo de desenvolver unha carga útil que sitúe a España á vangarda das comunicacións espaciais seguras. A misión Caramuel conta con diferentes fases. Na actualidade atópase na fase A, onde a UVigo participa liderando o paquete de traballo relacionado coa avaliación de protocolos.

“O obxectivo final é destilar unha clave secreta. Unha serie de números (ceros e uns) totalmente aleatoria que é igual entre o emisor e o receptor, garantindo a súa seguridade. É dicir, que ningún posible atacante poida ter acceso á información”, indicou o responsable deste proxecto na Universidade de Vigo, Marcos Curty.

Segundo explicou, a intención é lanzar un satélite comercial geoestacionario para comunicacións cuánticas, algo que, se todo sae ben, podería producirse en 2025. Tal como recolle o Diario da Universidade de Vigo (DUVI), a aparición dos computadores cuánticos permite unha potencia computacional moito maior que a dos computadores tradicionais para determinados problemas.

“Isto suporía un cambio de paradigma nas comunicacións seguras, xa que atacantes con ordenadores cuánticos poderán descifrar as encriptacións actuais en cuestión de segundos. Por iso, é fundamental o desenvolvemento dun sistema que permita enviar información coas garantías necesarias en contornas de comunicacións gobernamentais, xestión de infraestruturas críticas e aplicacións e servizos de interese económico, ambiental ou tecnolóxico, así como grandes corporacións”, explica.

“A criptografía clásica non pode garantir a seguridade das comunicacións, salvo que a capacidade computacional dun atacante estea limitada, e co desenvolvemento dos computadores cuánticos a seguridade das comunicacións actuais está seriamente ameazada”, engadiu Curty.

Ademais de liderar o paquete de traballo de avaliación de protocolos, a UVigo tamén participa no comité asesor desta misión, encargada de supervisar o conxunto de tarefas que se fixeron e que están por facer.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...