A Xunta presume da VAP Tui-A Garda, “un desafío para a enxeñaría”

Porá en servizo un novo tramo da VAP Tui-A Guarda a mediados de 2023, tras un investimento de 21 millóns.

O presidente da Xunta, Alfonso Rueda, nunha visita ás obras da Vía de Altas Prestacións (VAP) Tui-A Guarda.. DAVID CABEZÓN @ XUNTA DE GALICIA

Vía de Altas Prestacións (VAP) entre Tui e A Guarda contará cun novo tramo en servizo a partir de mediados de 2023, que permitirá a conexión entre o polígono empresarial de Areas en Tui e a autovía A-55.

Así o avanzou este martes o presidente da Xunta, Alfonso Rueda, que visitou, xunto coa conselleira de Infraestruturas, Ethel Vázquez, o avance das obras neste tramo, de 600 metros, no que se investiron 21 millóns de euros.

Rueda subliñou que este viario é unha “infraestrutura vital” para o desenvolvemento do Baixo Miño e facilitará a actividade do polígono industrial de Areas, que “agora mesmo está completo”.

O tramo que entrará en servizo supuxo, segundo destacou o presidente galego, “un desafío para a enxeñaría”, xa que enlaza sobre unha glorieta elevada unha vía cara a un polígono industrial, unha autovía internacional, unha estrada nacional (N-551) e unha estrada autonómica (PO-552).

Para levar a cabo a obra, que se atopa ao 40 % de execución, a Xunta “está a facer unha das maiores apostas orzamentarias dos últimos anos en estradas”, incidiu. Alfonso Rueda reafirmou o compromiso do goberno autonómico para continuar a construción da totalidade da VAP, na que se investiron xa máis de 80 millóns de euros. Así, este outono prevese que estea lista a Declaración de Impacto Ambiental para continuar a Vía de Alta Capacidade ata Goián (Tomiño), e avanzar na ligazón desde Areas ata a PO-350 en Sobrada (Tomiño).

O titular do Executivo galego puxo en valor a aposta da Xunta por “vertebrar” o territorio a través das infraestruturas e lembrou que, desde 2009, construíronse uns 220 quilómetros de vías de alta capacidade na Comunidade. “Isto supón que oito de cada dez galegos viven hoxe a menos de 15 minutos dunha vía deste tipo”, salientou.