Deteñen unha muller en Vigo acusada de maltratar á súa avoa

A anciá ten 88 anos e padece demencia.

Policía Local de Vigo

Unha muller de 32 anos foi detida como presunta autora dun delito de malos tratos no ámbito familiar por agredir á súa avoa, de 88 anos e que padece demencia senil. Os feitos ocorreron o pasado martes nunha casa da rúa Meixoeiro, segundo difundiu este xoves a Policía Local de Vigo, que recibiu o aviso de veciños da zona que aseguraban que as discusións na vivenda eran “moi frecuentes”.

Personados no lugar, os axentes foron recibidos por unha muller que manifestou que non ocorría nada. Nese momento, sempre segundo o relato policial, apareceu a filla da muller que abrira a porta, quen se atopaba “moi alterada e nerviosa” e que trasladou aos axentes “que discutira coa súa avoa, dado que tiña demencia senil”.

Os policías estableceron un diálogo coa octoxenaria, que asegurou aos axentes que a súa neta lle quitou o DNI e esixiulle o número PIN da conta bancaria, ao que se negou. Segundo a vítima, a súa neta suxeitouna pola camiseta, moveuna e, despois, agarrouna da mandíbula para, a continuación, empuxala. Tras a denuncia, os axentes procederon á detención da muller de 32 anos como suposta autora dun delito de malos tratos no ámbito familiar.