O alcalde de Vigo, Abel Caballero, respondeu este mércores ás denuncias de sindicatos e membros do servizo de bombeiros da cidade, que volveron alertar sobre a falta de persoal e o risco que iso supón, asegurando que o devandito servizo “está a funcionar de acordo coa norma”.
Así se expresou o rexedor olívico a preguntas dos medios acerca desas advertencias dos bombeiros, que afirmaron que a escaseza de efectivos levaron a “pechar” outra vez o parque de Coruxo o pasado fin de semana.
Caballero proclamou que o servizo funciona de acordo á normativa, sen entrar en máis detalles, aínda que si se referiu ao auto do xulgado de instrución 5 de Vigo, polo que se arquivaron as actuacións contra o concelleiro Carlos López Font (e contra o xefe da área de Seguridade), denunciado pola CIG por aplicar un decreto que impuña as horas extras e que logo foi anulado polos tribunais.
O alcalde preguntou “quen vai dimitir” despois do arquivo da causa e acusou a quen promoveron ditas dilixencias de interpor unha “denuncia falsa”. “Unha denuncia falsa é unha cuestión gravísima”, insistiu o rexedor, quen proclamou que “foi sobreseída e, se está arquivada, é falsa”.
Precisamente, no auto de sobresemento das dilixencias, a xuíza recolle o principal argumento empregado polos investigados para defender a aplicación do decreto: a necesidade de “forzar” as horas extraordinarias para cubrir un mínimo de 20 efectivos nos parques de bombeiros, sen os cales, en caso de sinistro, “a indefensión dos cidadáns sería absoluta”.
ANOS DE DENUNCIAS
Os bombeiros de Vigo levan anos denunciando a sobrecarga de traballo por falta de persoal e o feito de que, nunha porcentaxe moi elevada de xornadas, os parques da cidade non contan con ese mínimo de 20 efectivos. De feito, os sarxentos responsables na actualidade do servizo, convocaron unha rolda de prensa para este xoves, para denunciar a súa “precariedade” e o “risco inminente” para a seguridade dos cidadáns e dos propios funcionarios.