Un mozo denunciou ante a Policía Nacional sufrir unha agresión grupal na madrugada do pasado domingo nunha zona de festa da cidade de Vigo.
Tal como informaron fontes do corpo de seguridade, existe unha investigación aberta polos feitos, que terían ocorrido preto dunha parada de taxis do Arenal, na urbe olívica.
Segundo adiantou ‘Faro de Vigo’, o mozo, de 20 anos, tivo que ser atendido de urxencia no Hospital Álvaro Cunqueiro despois de que un grupo de persoas tentase coarse para coller un taxi, polo que el e unha amiga indicáronlle que estaban eles primeiro.
Nese momento, un home agrediuno, tras o cal máis persoas uniríanse á pelexa, dándolle patadas e puñadas á vítima, que recibiría dentadas na cara, ademais de golpes nas costas, na cabeza, nas costelas e nos riles.