Os alcaldes do PP reprochan a Caballero que avale o plan de aforro enerxético sen debatelo na FEMP

O alcalde de Vigo participou en representación das entidades locais na Conferencia Sectorial de Enerxía.

O alcalde de Vigo, Abel Caballero / Concello.

Os alcaldes do PP expresaron este martes a súa desconformidade co presidente da Federación Española de Municipios e Provincias (FEMP), e alcalde de Vigo, Abel Caballero, por dar o seu apoio ao decreto do Goberno de central que recolle o plan de aforro enerxético sen contar co aval da organización municipalista.

Abel Caballero participou en representación das entidades locais na Conferencia Sectorial de Enerxía deste luns que abordou o decreto de medidas de aforro enerxético, mostrando o seu apoio e cooperación a este plan do Goberno.

Con todo, o vicepresidente da FEMP e alcalde de Estepona, José María García Urbano, denunciou que a institución non tratou nin analizou nos seus órganos de goberno este decreto, polo que recriminou a Abel Caballero que dese o aval da Federación a estas medidas.

Neste contexto, García Urbano censurou que desde a presidencia da FEMP se adopten decisións que afectan a todas as entidades locais “de maneira unilateral e sen que exista unha postura oficial da institución“.

Pola súa banda, o portavoz do PP na FEMP e alcalde de Zaragoza, Jorge Azcón, cualificou de “intolerable” que Caballero utilice a presidencia da FEMP para, baixo o seu punto de vista, “soster a Sánchez e o seu Goberno”.