O alcalde de Vigo, Abel Caballero, avanzou este mércores en rolda de prensa que o seu goberno está xa traballando no orzamento municipal de 2023 e que a previsión é que as contas rolden os 295 millóns de euros, 10 millóns máis que as do exercicio actual.
Segundo o rexedor, o orzamento de Vigo para o ano que vén terá tres características fundamentais: “un carácter investidor, será dinamizador da economía e con dimensión social”. “Estamos a falar dun documento para os servizos públicos, axudas e transformación da cidade”, aseverou.
Por outra banda, subliñou que, aos 295 millóns previstos, haberá que sumar o financiamento procedente da Deputación de Pontevedra e os remanentes do ano 2022. Así, as contas de fondos propios suman 275 millóns, aos que se engaden os fondos Next Generation UE que o goberno local xa solicitou.
Mentres, Abel Caballero criticou que a achega da Xunta á cidade é “negativa”, porque dá a Vigo algo máis de 5 millóns, pero os vigueses teñen que “pagar parte dos centros de día, das escolas infantís, parte de atención á dependencia,…”.
REUNIÓN CO REITOR
Por outra banda, o alcalde informou en rolda de prensa da reunión mantida este mércores co reitor da Universidade de Vigo, Manuel Reigosa, en avanzárona na cooperación entre a institución académica e o Concello olívico.
Segundo Abel Caballero, ambos abordaron cuestións como a cesión do edificio Siemens da ETEA á UVigo para formar parte do Campus do Mar, sobre a que manterán proximamente unha reunión co delegado de Zona Franca, David Regades.
Así mesmo, Caballero reafirmou o apoio municipal na subvención do transporte aos estudantes universitarios, e ofreceu ao reitor o Auditorio Mar de Vigo, de forma gratuíta, para a realización de eventos.
LUCES DE NADAL
Abel Caballero anunciou este mércores o inicio da tramitación para licitar varios lotes para a decoración lumínica de Nadal, a instalación de elementos ornamentais e actividades de animación, por un importe total de 1,8 millóns de euros e para tres campañas do Nadal.
Nunha rolda de prensa, o rexedor olívico confirmou que a Xunta de Goberno Local aprobará este xoves, a contratación deses servizos mediante a licitación en varios lotes, que inclúen a instalación de elementos lumínicos decorativos como as árbores, a gran bóla, a caixa de agasallos e o oso de luces LED.
Así mesmo, aprobarase a programación do Nadal que inclúe os mercadillos en varias zonas da cidade (entre eles o Cíes Market da Praza de Compostela), nora, pista de xeo e de karts, carrusel, trens turísticos, atraccións e actividades de animación sociocultural.
“Nós, o Nadal programámolo. Non hai que improvisar, operamos con moita antelación”, explicou o alcalde, que reiterou que a campaña do Nadal de Vigo “é marabillosa” e que é a acción “que máis retorno ten por euro investido do mundo”.