A sección quinta da Audiencia Provincial de Pontevedra condenou a 3 anos e medio de cárcere a dous administradores dunha sociedade que se dedicaban á venda por xunto de suplementos dietéticos e deportivos, e tamén fornecían fenacetina (unha sustancia canceríxena) a particulares.
Ademais da pena de prisión, o tribunal impuxo a cada un dos procesados o pago dunha multa de 74.610 euros, e aplicou a circunstancia atenuante de dilacións indebidas. Contra esta sentenza cabe recurso de apelación ante o TSXG.
Segundo recóllese na resolución, os servizos de inspección da Consellería de Sanidade atoparon, en outubro de 2015, 19 bidóns de fenacetina, cun peso cada un de 25 quilos, que estaban nas instalacións da empresa, no polígono de Miraflores en Vigo. A comercialización de fenacetina, que é canceríxena, non está permitida e só se pode utilizar na industria cosmética, previa inscrición nun rexistro regulado por un regulamento comunitario europeo.
PARTIDA COMPRADA EN CHINA
A fenacetina atopada nesta nave industrial formaba parte dunha partida dunha tonelada que os acusados compraran en China no verán de 2015. “De dita partida, xa dispuxeran da cantidade de 525 quilos, que venderan a unha empresa de Portugal”, recollen os xuíces na sentenza.
Así mesmo, o tribunal apuntou que, antes de adquirir o produto en China, comprábano de forma regular a outra entidade, á que, como consecuencia dunha inspección, comunicóuselle que non podía seguir comercializándoa. Isto levou aos acusados, “sendo conscientes do seu carácter canceríxeno, a buscar este produto noutros provedores, que acharon en China”.
A Sala considera acreditado que os condenados vendían a sustancia en “pequenas cantidades, dun ou dous quilos”, a particulares, “aos que non se lles esixía ningunha comprobación”.
SUSTANCIAS PARA O CORTE DE DROGAS
No rexistro da nave, ademais da fenacetina, atopáronse outras sustancias, empregadas no corte de cocaína e outras drogas, así como precursores químicos.
Así, interviñéronse “compostos que son utilizados de forma habitual como sustancias de corte e adulterantes de diversas drogas de abuso”, e “non consta” que os empresarios procesados “exercesen unha actividade laboral ou comercial algunha que xustificase o investimento que supuña a adquisición das sustancias que os incrimina”.
Por estes feitos, a Audiencia considerou aos acusados autores de dous delitos contra a saúde pública, un deles referido a medicamentos e produtos sanitarios, e condenounos a penas que suman 3 anos e medio de prisión, e a pagar multas por un total de 74.610 euros.
