O BNG de Vigo propuxo este luns a creación dunha comisión de seguimento das obras na cidade, ante a “situación de caos que se vive en moitas rúas”, na que estean representados o movemento veciñal, organizacións sindicais e persoal técnico.
Así, o concelleiro nacionalista Xabier Pérez Igrexas puxo sobre a mesa a creación deste órgano para poñer fin ao “colapso” en moitos ámbitos da cidade, e para facer un “control exhaustivo” das actuacións, co fin de impedir as demoras na súa execución. “Hai que poñer racionalidade na xestión da obra pública e asegurar que as empresas adxudicatarias cumpren escrupulosamente tanto os prazos como as condiciones nas que se teñen que desenvolver”, apuntou Pérez Igrexas.
Tras cualificar como “nefasta” a xestión do goberno local nesta área, puxo como exemplos os traballos en Martínez Garrido, que provocan “importantes retencións de tráfico”; ou a “paralización inexplicable” doutras actuacións, como a instalación dunhas escaleiras mecánicas na rúa Noiro.