O Servizo Galego de Saúde (Sergas) anunciou a licitación da obra da Unidade Funcional Multidisciplinar de Enfermidades raras no hospital Álvaro Cunqueiro de Vigo por un importe de máis de 151.000 euros.
Tal como indicou a Xunta nun comunicado, o Goberno galego continúa así avanzando no seu compromiso de realizar un investimento de 5,7 millóns de euros en novas dotacións ao centro hospitalario. Este anuncio súmase ás licitacións informadas o pasado mes de maio, da obra da nova Unidade de Necropsias, por 300.000 euros, e o proxecto de reforma de Hospitalización a Domicilio, cun investimento global de 500.000 euros.
“O obxectivo destas actuacións é dotar o Cunqueiro de novos espazos e equipamentos, xa que o Executivo galego considera que, unha vez consolidado este hospital, é o momento de afrontar actuacións para reforzar a súa funcionalidade”, engadiu. Coa nova estrutura, a Unidade Funcional Multidisciplinar de Enfermidades Raras, que xa comezou a funcionar en febreiro deste ano, disporá dun espazo físico propio.
Este novo dispositivo sanitario, que coordina o diagnóstico e o seguimento dos pacientes con estas patoloxías, enmárcase no desenvolvemento da Estratexia Galega en Enfermidades Raras, que ten por obxectivo unha abordaxe integral destas enfermidades.
