O alcalde de Vigo, Abel Caballero, anunciou este xoves que proporá ao Ministerio de Cultura o nome do escritor Domingo Villar para designar á futura Biblioteca do Estado na cidade olívica. Nunha rolda de prensa, o rexedor avanzou que fará esta proposta para render homenaxe ao autor vigués, falecido nas últimas horas de forma prematura e tras sufrir unha hemorraxia cerebral.
Caballero tamén avanzou que o Concello organizará un “acto cidadán” en memoria do escritor, con música e literatura; e que encargará unha escultura para que o recordo de Domingo Villar “permaneza para sempre” na cidade. Sobre a localización, o alcalde propuxo a alameda da Praza de Compostela, aínda que non é unha idea definitiva.
