InicioVigo e contornaVigoVigo terá que abonar 295.000€ ao Celta tras o fallo do TSXG

Vigo terá que abonar 295.000€ ao Celta tras o fallo do TSXG

A subvención foi comprometida para 2019 pero non se chegara a executar.

PUBLICADO O

A sala do Contencioso Administrativo do Tribunal Superior de Xustiza de Galicia (TSXG) desestimou un recurso do Concello de Vigo contra unha sentenza de primeira instancia, e ordénalle tramitar unha subvención de 295.000 euros para a Fundación Celta, comprometida nos orzamentos municipais de 2019.

Segundo a sentenza, no seu recurso, o Concello, limitouse a repetir os argumentos esgrimidos en primeira instancia, sen achegar probas de que a resolución do Contencioso Administrativo 1 de Vigo sexa contraria a dereito.

Os feitos remóntanse a xullo de 2020, cando a Xunta de Goberno Local acordou desestimar a petición da Fundación Celta sobre o abono desa subvención, que ía destinada a dinamizar o fútbol base e que non se fixo efectiva. A entidade celeste presentou entón recurso nos xulgados vigueses, que lle deron a razón, ao considerar que non se cumpriron os trámites para conceder as subvencións directas nominativas contempladas no orzamento local de 2019, e o Concello respondeu cun recurso de apelación ante o TSXG.

Na súa sentenza, o alto tribunal galego expón que o recurso presentado polo Concello “adoece dunha absoluta falta de crítica da sentenza apelada”, á vez que asegura que se trata “dunha mera reiteración dos argumentos de instancia, disfrazados ou reformulados”.

Por iso, os maxistrados lembran que o recurso “non constitúe unha segunda instancia para repetir os mesmos argumentos que xa se resolveron”, xa que “soamente deben considerarse as alegacións que se dirixan a acreditar o erro en que se puido incorrer na sentenza que se impugna, a falta de valoración debida da proba practicada ou defecto na aplicación da norma xurídica que resulte aplicable”.

Así, o TSXG ve “evidente” que o Concello non está conforme co fallo e que, ao presentar recurso de apelación, o que fai é “evitar que adquira firmeza, dilatando o seu cumprimento”. Ademais, afirma que o Concello se alza “contra unha sentenza que precisamente ordena que cumpra as obrigacións de tramitación omitidas”.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...