Abel Caballero sinala como “intolerable” e “inxustificado” a rebaixa salarial na concesionaria de bus

Abel Caballero subliñou que "non hai ningunha causa que xustifique" unha redución salarial do persoal de Vitrasa, e advertiu á concesionaria de que "vai ter ao Concello absolutamente enfronte" se mantén as súas pretensións.

O alcalde de Vigo, Abel Caballero.

O alcalde de Vigo, Abel Caballero, insistiu este martes en que é “intolerable” e “inxustificado” a rebaixa salarial exposta pola concesionaria de bus urbano, Vitrasa, que pretende rebaixar nun 30 % o salario dos traballadores alegando o risco de quebra económica, e advertiu de que os servizos xurídicos municipais analizarán as “vías de actuación” do Concello neste caso.

Así o trasladou o rexedor nunha rolda de prensa a preguntas dos xornalistas, e despois de que finalizase sen acordo o prazo de negociación previa entre empresa e traballadores para a suspensión da aplicación do convenio colectivo.

Abel Caballero subliñou que “non hai ningunha causa que xustifique” unha redución salarial do persoal de Vitrasa, e advertiu á concesionaria de que “vai ter ao Concello absolutamente enfronte” se mantén as súas pretensións.

Por outra banda, Marea de Vigo esixiu ao goberno municipal que audite os números da concesionaria, despois de que UGT denunciase que Vitrasa imputa ás súas contas gastos doutras sociedades do grupo Avanza. A concelleira Oriana Méndez subliñou que o diñeiro dos vigueses non debe destinarse a financiar “aventuras societarias” da empresa e volveu a pedir a municipalización do servizo de bus urbano.

Mentres, o grupo municipal do PP censurou a intención de rebaixar o soldo argumentando que “non gaña diñeiro suficiente” e preguntou “por que, entón, aceptou unha prórroga do contrato en plena pandemia”. Respecto diso, acusou ao goberno local de impor esa prórroga dun contrato dos anos 90 que prexudica aos usuarios e, agora tamén, aos empregados da concesionaria.