A nova Cidade da Xustiza de Vigo, cuxas obras están a piques de finalizar, xa ten data de inauguración: será o 24 de maio, con presenza dos Reyes de España e do presidente do Consello Xeral do Poder Xudicial, Carlos Lesmes.
Así o confirmou este xoves o presidente da Xunta, Alberto Núñez Feijóo, na rolda de prensa posterior á reunión do Consello do goberno autonómico, que se reuniu en Vigo.
Feijóo, que visitou este xoves o novo edificio rehabilitado (e que ata hai uns anos era o Hospital Xeral Cíes) cos conselleiros do seu equipo, avanzou tamén que se convocará un concurso de ideas para a reforma dun dos edificios dos actuais xulgados, onde se habilitarán espazos para entidades sociais e para dependencias administrativas da Xunta.
Así mesmo, explicou que os actuais edificios dos xulgados, na rúa Lalín, xa teñen finalidade para cando se realice o traslado e queden baleiros. O inmoble que actualmente alberga as salas penais e seccións da Audiencia será o Centro Integral de Saúde Olimpia Valencia, mentres que o outro edificio, o máis antigo, albegará espazos para entidades sociais e para dependencias administrativas da Xunta.
Precisamente, desvelou a convocatoria dun concurso de ideas para a reforma desas dotacións en colaboración co Colexio oficial de Arquitectos de Galicia. Prevese que o proxecto gañador presente a súa proposta en decembro e póidase licitar o contrato na primeira metade de 2023. En total, crearanse 134 espazos e o investimento estimado é de 12,5 millóns de euros.
Por outra banda, o presidente galego deu conta tamén de varios acordos do Consello relacionados coa cidade olívica, entre eles 5,7 millóns en investimentos para novas unidades e equipamentos no Hospital Álvaro Cunqueiro, 15,5 millóns para melloras de mobilidade ou 6,1 millóns para melloras en Cíes e outros arquipélagos do Parque Nacional Illas Atlánticas.
