O BNG pide rectificar o plan de vivendas de Navia para aumentar a oferta pública

Só 80 das1.600 vivendas serán de protección oficial.

O concelleiro do BNG en Vigo, Xabier Pérez Igrexas, con delegadas da CIG na concesionaria que presta o Servizo de Axuda non Fogar (SAF) na cidade olívica.. BNG DE VIGO

O Bloque Nacionalista Galego reclamou á Xunta que “rectifique” o plan parcial do barrio vigués de Navia para incrementar o número de vivendas protexidas e crear un parque público na cidade olívica.

Neste sentido, os nacionalistas rexistraron no Parlamento galego unha iniciativa que se debaterá no próximo pleno para urxir cambios no proxecto do Executivo, “que só garante 80 vivendas de promoción pública das 1.600 previstas”, a pesar da “elevada demanda” na cidade e aos prezos “disparatados” do aluguer e a compravenda.

“Pode ser unha oportunidade histórica para ter un necesario parque público de vivendas na cidade ou outra oportunidade perdida que siga pondo por diante os intereses das construtoras e dos axentes inmobiliarios”, denunciou a deputada do BNG Alexandra Fernández, acompañada do concelleiro nacionalista en Vigo, Xabier P. Igrexas, este venres.

O BNG pide na iniciativa que a Xunta destine a vivenda pública unha porcentaxe “significativa” das previstas en Navia, en correspondencia coa “ampla demanda” con 5.700 persoas inscritas como solicitantes no Instituto Galego de Vivenda e Solo. A maioría delas, segundo explica o Bloque, reclaman vivendas en réxime de aluguer fronte “ao modelo do PP que aposta de forma sistemática pola venda”.