O Concello de Vigo abriu o expediente para o convenio que prevé asinar en próximas semanas con Adif, mediante o cal o administrador ferroviario cederá espazos ao final da rúa Callao, unha pista de terra sen asfaltar que discorre paralela á rúa García Barbón e á AP-9, e que será humanizada.

Segundo explicou en rolda de prensa o rexedor, Abel Caballero, ese acordo permitirá “abrir unha rúa nova” na cidade, porque actualmente a zona non é máis que unha pista de terra con “fochancas de 30 centímetros de profundidade”, e comunicar ese tramo de García Barbón e Serafín Avendaño (onde tamén se construirá o ascensor ‘Halo’) con Canadelo Baixo e o ‘nó’ de Isaac Peral.

“Herdamos un Vigo que ten rúas que non son rúas. Herdamos unha bazofia, con vivendas ás que non pode chegar unha ambulancia, unha rúa que ninguén sabe de quen é…”, aseverou o alcalde, que avanzou que, ademais do convenio con Adif (que se asinará “en dous meses”), o goberno local está xa “redactando o borrador” do proxecto de humanización.