O espectáculo ‘Ghost, el musical’ chega este xoves a Vigo con David Bustamante ou Cristina Llorente entre os protagonistas dun elenco que conta tamén con Christian Sánchez ou Ela Ruiz. Tal como informou a súa organización, ‘Ghost, el musical’ estará no Auditorio Mar de Vigo ata o vindeiro domingo, día 6 de marzo, representando seis únicas funcións, despois de dúas tempadas na Gran Vía de Madrid.
O musical, que traslada ás táboas do teatro a historia de amor que triunfou na gran pantalla en 1990, é unha produción orixinal dirixida por Federico Bellone, director artístico de espectáculos de recoñecida traxectoria internacional como ‘Mary Poppins’. O espectáculo conta cun elenco formado por 17 artistas. Bustamante e Ricky Merino altérnanse no papel de Sam e a actriz Cristina Llorente dá vida á inigualable Molly. Christian Sánchez interpreta ao amigo e compañeiro de traballo de Sam (Carl) e Ela Ruiz á enigmática Oda Mae.
Ademais, forman parte do musical Joan Mas (no papel do ladrón chamado Willy López), Óscar Albert (o inquieto fantasma que rolda no metro), Esteban Oliver (o fantasma do hospital), Juls Eslamiada (Clara, irmá De Oda Mae), Nathaly Salim (Louise, irmá De Oda Mae), Patricia Serradell (Sra. Santiago), Sergio Escribano, Gerard Minguez e Francisco Gala (ensemble masculino) Elena González e María José Arcas (ensemble feminino). Como swings o espectáculo conta con Jose Miralles e María Moreno.
Esta mañá, o alcalde de Vigo, Abel Caballero, visitou os protagonistas do musical e encomiou o “gran espectáculo” que representan, mostrando o seu convencemento de que a cidade “responderá” porque Vigo “é unha fábrica de música”.
