O xulgado do Contencioso-Administrativo número 1 de Vigo desestimou o recurso presentado por unha muller que foi multada polo Concello de Vigo por estar na terraza dun local sen máscara, e confirmou a sanción imposta.
Os feitos ocorreron na noite do 13 de agosto de 2020, cando axentes da Policía Local observaron a esta muller nunha terraza dun establecemento da zona do Náutico. Os policías pedíronlle que se puxese a máscara e ela negouse en varias ocasións, polo que foi denunciada e impúxoselle unha multa de 80 euros.
A muller presentou recurso por considerar que o Concello de Vigo non tiña competencia para impor esa sanción, pero o xulgado rexeitou dito recurso e confirmou a multa. Na resolución xudicial, o maxistrado sinala que a sanción do Concello é axustada a dereito, posto que a administración municipal ostentaba competencia, por razón de territorio e de saúde pública, para “instruír e sancionar”.
Así, o xuíz lembrou que o Concello ten “competencia en materia sanitaria para controlar actividades, tales como a estancia en espazos de convivencia humana sen cumprir as medidas ordenadas polas autoridades sanitaria”. Respecto diso, apuntou que a terraza dun local aberto ao público, no que se distribúen bebidas e alimentos, é “un lugar de convivencia humana”.
O titular do Xulgado do Contencioso-Administrativo número 1 de Vigo sinala que o ordenamento xurídico obriga os concellos a “controlar esas actividades neses lugares”, polo que conclúe que terán que contar coa “potestade sancionadora dentro do ámbito das súas competencias”.
