Renfe e a súa homóloga portuguesa Comboios de Portugal ofrecen desde este martes e ata o próximo 30 de xuño preto de 15.000 prazas promocionais nos trens Celta entre Vigo e O Porto desde 5,25 euros. Tal como informou Renfe nun comunicado, o prezo do billete é de 5,25 euros se se viaxa desde a cidade olívica ata O Porto, mentres que se se sae de Santiago a contía ascende a 10,30 euros.

Os servizos Celta xa están recuperados na súa totalidade desde o ano pasado, con catro viaxes ao día, sumando ida e volta. Así, as saídas desde Vigo-Guixar son ás 8,58 horas e ás 19,56 horas (hora española), chegando ao Porto ás 10,20 horas e ás 21,18 horas (hora portuguesa), respectivamente.

Pola súa banda, desde a cidade lusa tamén saen dous trens ao día, ás 8,13 horas e ás 19,10 horas, hora portuguesa, con chegada a Vigo ás 11,35 horas e ás 22,34 horas, respectivamente (hora española).