O Concello de Vigo non “regalará” dous pavillóns do Ifevi á Xunta para crear un módulo de atletismo

O portavoz do goberno local, Carlos López Font, apuntou á Xunta: "se quere construír pavillóns deportivos, que busque o espazo, pero nunca no Ifevi".

O goberno municipal de Vigo trasladou este xoves a súa oposición a “regalar” dous pavillóns do Instituto Feiral de Vigo (Ifevi) para a construción dun módulo de atletismo, como pretende a Xunta, e subliñou que o recinto debe usarse unicamente para actividade feiral.

Así o manifestou o portavoz do goberno local, o socialista Carlos López Font, que mostrou a súa “preocupación” pola proposta da presidencia do padroado do Ifevi (que ostenta o conselleiro e vicepresidente Francisco Conde) e que “supón, na práctica, regalarlle á Xunta os pavillóns 3 e 5 como pavillóns deportivos”.

“Estamos en contra. Supón descapitalizar un recinto feiral“, advertiu López Font, quen considera “inaceptable” a proposta do goberno autonómico, nunha cidade como Vigo, “cidade da economía”.

Ante esta situación, o portavoz municipal cuestionou se haberá que “pedir permiso” para a celebración dun evento feiral no Ifevi e ha institido en que non se poden “regalar” espazos para actividades que non sexan feirais. “Isto vai en contra da economía de Vigo”, sentenciou, á vez que apuntou á Xunta: “se quere construír pavillóns deportivos, que busque o espazo, pero nunca no Ifevi”.

RESPOSTA ÁS NECESIDADES DOS CLUBS

Pola súa banda, a Xunta defendeu a súa proposta, que foi anunciada en xaneiro do ano pasado polo propio Núñez Feijóo e que complementa as obras de ampliación do recinto feiral.

Segundo explicaron fontes autonómicas, a nova dotación deportiva “potenciará a multifuncionalidad das instalacións” achegando novos equipamentos aos deportistas vigueses. De feito, lembraron, o módulo cuberto de atletismo no Ifevi vén dar resposta ás demandas dos clubs e atletas de Vigo e da área, e servirá para paliar a situación de “parálise” que afecta a estes deportistas polas malas condicións nas que se atopan as pistas municipais de atletismo de Balaídos.

Precisamente, con respecto ás pistas de Balaídos, a Xunta asegurou que traballa no “cumprimento do compromiso da reforma” das devanditas instalacións, unha obra “bloqueada polos problemas urbanísticos do Concello de Vigo provocados pola anulación do seu Plan Xeral”.

O anuncio da Xunta de que construiría ese módulo deportivo no Instituto Feiral de Vigo foi acollido, inicialmente, con escepticismo por parte do goberno local que dirixe Abel Caballero. De feito, o rexedor cuestionou no seu día a legalidade desa actuación porque non se contempla no proxecto de ampliación do recinto.

Posteriormente, e no marco das críticas polo atraso das obras de ampliación, Abel Caballero asegurou que o módulo de atletismo non se construiría. Agora, o goberno local ratificou o seu rexeitamento ao mesmo, ao considerar que o Ifevi non debe acoller actividade deportiva, senón exclusivamente feiral.