A Universidade de Vigo (UVigo) coordina o deseño dunha aplicación web que permita automatizar o proceso de detección de informacións falsas para pescudar se as afirmacións realizadas polos políticos participantes nun debate electoral son certas ou non.
Este é o principal obxectivo do proxecto DEBATrue, que coordinan os investigadores do grupo CP2 da Facultade de Ciencias Sociais e da Comunicación, Xosé Rúas e Ana Belén Fernández Souto.
Son 20 os investigadores de diferentes ámbitos que integran o equipo de traballo dunha iniciativa dirixida a contribuír “á loita contra a desinformación” a través da identificación de “datos falsos que poidan desvirtuar a calidade democrática e alterar o normal desenvolvemento do proceso electoral”.
O propósito é sumar aos actuais procesos manuais de verificación unha aplicación dixital que automatice parte deste proceso, contribuíndo a que se acelere a comprobación e a verificación da información, segundo explican os seus responsables.
“Estamos nun contexto de desconfianza e o que pretendemos é traballar sobre a economía da confianza a través dunha ferramenta acreditada”, indicou Rúas.
