Empresarios de Vigo e Mos pensan mudar os seus negocios a Portugal pola “presión” e “inseguridade” dos comuneiros de Cabral e Tameiga

A Xustiza outorgou a propiedade do chan que ocupan as compañías ás comunidades de montes.

Empresarios de Vigo e Mos visitan Valença na procura de chan industrial / AEMOS.

Un grupo de empresarios de Vigo e de Mos reuníronse esta semana co presidente da Cámara Municipal de Valença, José Vaz Carpinteira, para estudar un posible traslado das súas compañías (actualmente nos polígonos de Monte Faquiña -Mos- e Cotogrande e O Gorxal -Vigo-) ante a “presión” e a “inseguridade” xerada polas comunidades de montes de Cabral e Tameiga.

Tal como informou a Asociación de Empresarios de Mos (AEMOS), os contactos iniciados meses atrás por empresarios de compañías asentadas en Monte Faquiña coa Cámara Municipal de Valença do Minho para estudar un hipotético traslado das súas instalacións ao Norte de Portugal son cada vez “máis intensos”, debidos á “inamovible” postura da Comunidade de Montes en Man Común de Tameiga de “incrementar desmesuradamente” o canon que pagan estas empresas polos terreos que ocupan.

Esta vez na reunión tamén estiveron empresarios da parroquia viguesa de Cabral, onde xa un xuíz de primeira instancia fallou a prol da Comunidade de Montes para que varias empresas do polígono do Gorxal entregasen os seus terreos aos comuneiros.

“En ambos os casos, a problemática xurdiu por mor de que os tribunais outorgasen a propiedade do chan que ocupan as compañías ás comunidades de montes. Os comuneiros de Tameiga decidiron non respectar as condicións dos contratos fixados no seu día polo Concello de Mos coas firmas empresariais, que realizaron millonarios investimentos para pór en marcha as súas actividades baixo a premisa de contar cun canon determinado e unha duración da concesión suficiente para garantir a amortización do negocio”, lamentaron desde AEMOS.

No encontro, José Vaz Carpinteira asegurou a existencia de entre 30.000 e 40.000 metros cadrados de chan completamente urbanizado e preparado para a súa ocupación inmediata e lembrou o proxecto de ampliar o actual polígono industrial competencia da Cámara en 400 hectáreas.

Tamén se referiu ao desenvolvemento dunha plataforma loxística de promoción privada e á opción de contar con chan industrial dependente de comunidades veciñais en concesión e a prezo simbólico. O presidente da Cámara de Valença, segundo recolle AEMOS, fixo mención expresa ao seu interese por atraer investimentos ao municipio, para o que ofreceu “total dilixencia, asesoramento e axudas”.